Oliy taʼlim, fan va innovatsiyalar vazirligining 2024-yil 11-oktyabrdagi 3/15-589-sonli xati ijrosini ta’minlash maqsadida Adiblar xiyobonida Renessans ta’lim universiteti tomonidan “Milliy qadriyatlar sayli” tashkil etildi.
Unda talabalar faol ishtirok etib, ulug‘ jadidlardan biri Abdulhamid Sulaymon o‘g‘li Cho‘lpon haykali atrofida jam bo‘lishdi. Haykal yonida g‘azalxonlik, mushoira, milliy liboslar, rassomchilik, Cho‘lponning hayoti va ijodiga oid sahna ko‘rinishi va milliy urf-odatlarini aks ettiruvchi “Milliy qadriyatlar sayli” tashkil etildi.
Pedagogika fakulteti Sport faoliyati kafedrasi talabalari tomonidan milliy xalq o‘yinlari o‘tkazildi.
Talabalar guruhlar kesimida arqon tortish musobaqasini o‘tkazishdi. Musobaqada qizlar jamoalari ham faol ishtirok etishdi.
Dizayn yo‘nalishi talabalari tabiat qo‘ynida Cho‘lpon haykali suratini chizib o‘z iqtidorlarini namoyish etishdi. Shuningdek, haykal atrofida yig‘ilgan professor-o‘qituvchilar va talabalar, birgalikda badminton, voleybol va shu kabi sport o‘yinlarini o‘ynashdi. Shu bilan birga, epchil va chapdast yigitlar ishtirokida milliy o‘yinlardan kurash va tosh ko‘tarish musobaqalari ham uyushtirildi.
Bundan tashqari xiyobonda Toshkent shahridagi oliy ta’lim muassasalari sport jamoalari ishtirokida “Arqon tortish” o‘yinlari ham tashkil etildi. Unda Renessans ta’lim universiteti jamoasi faol ishtirok etdi.
Shu tariqa “Milliy qadriyatlar sayli” o‘zgacha shukuh va kayfiyatda yakunlandi.
