Matematika va iqtisod fakulteti Kompyuter injiniringi yo‘nalishi talabalari ishtirokida buyuk adiblar Alisher Navoiy va Zahiriddin Muhammad Boburning tavallud kunlarini nishonlash maqsadida axborot-murabbiylik soati bo‘lib o‘tdi.
Darsning birinchi qismida Alisher Navoiy haqida so‘z bordi. U faqat o‘zbek adabiyotining emas, balki butun jahon madaniyatining ulug‘ namoyandalaridan biridir. Uning eng mashhur asari – “Xamsa” o‘zining betakror badiiy uslubi va mazmuni bilan Sharq adabiyotida alohida o‘rin tutadi. Navoiy shoir sifatida obro‘ qozongan bo‘lsa-da, davlat arbobi sifatida ham xalqiga katta xizmat qilgan.
Darsning ikkinchi qismida esa Zahiriddin Muhammad Bobur haqida so‘z yuritildi. U nafaqat buyuk sarkarda, balki tarix va adabiyotga ulkan hissa qo‘shgan shoir va yozuvchi hamdir. Uning “Boburnoma” asari esa nafaqat o‘z davrining ijtimoiy-siyosiy manzarasini yoritib beruvchi bebaho manba, balki yuksak adabiy merosdir. Talabalar Boburning hayoti, ijodi va tarixiy rolini chuqur o‘rganib, o‘z fikr-mulohazalarini bildirishdi.
Bunday tadbirlar yosh avlodga milliy merosimizni chuqur anglash va buyuk ajdodlarimiz bilan faxrlanish hissini beradi.
O'zbekcha
Русский
English
