Renessans ta’lim universitetining vakillari Ufa shahrida o‘tkazilgan belbog‘li kurash bo‘yicha xalqaro musobaqada ulkan muvaffaqiyatga erishdi.

Universitetning Pedagogika fakulteti, “Sport faoliyati” kafedrasi vakillari o‘zining mahorati va kuchi bilan barchani lol qoldirdi. Zaylobiddin Artiqov musobaqada faxrli 1-o‘rinni qo‘lga kiritib, oltin medal sohibiga aylandi. Og‘abek Amatboyev esa munosib tarzda 2-o‘rinni egallab, kumush medal bilan taqdirlandi.

Musobaqada Pedagogika fakulteti, “Sport faoliyati” kafedrasi 1-bosqich talabasi Xaydarali Ahadjonov ham o‘z salohiyatini ko‘rsatdi. U 3-o‘rinni egallab, bronza medalini qo‘lga kiritdi. Yosh sportchimizning muvaffaqiyati universitetimizda ustoz-shogird tizimining  yaxshi yo‘lga qo‘yilganligining yorqin namunasidir.

Ushbu muvaffaqiyat universitet jamoasi uchun ulkan yutuq hamda yangi yilga munosib sovg‘a bo‘ldi. G‘oliblar sport orqali yoshlarga jismoniy tarbiya bilan birga qat’iyat va mehnatsevarlik kabi muhim hayotiy qadriyatlarni o‘rgatish mumkinligini yana bir bor isbotladi.

Universitetimiz professor-o‘qituvchilar va talabalar uchun sportni hayotning ajralmas qismi sifatida targ‘ib qilib kelmoqda. Bu natija Renessans ta’lim universitetining sport va madaniyat sohasidagi ulkan yutuqlarga erishayotganidan dalolat beradi.

Zaylobiddin Artiqov, Og‘abek Amatboyev va Xaydarali Ahadjonovning g‘alabalari nafaqat universitetimiz, balki mamlakatimiz sporti tarixida ham yodda qolarli sahifa bo‘lib qoladi.

Biz sportchilarimiz bilan faxrlanamiz va ularga kelgusidagi musobaqalarda ulkan zafarlar tilaymiz!