Xabaringiz bor, joriy yilning 3-8-mart kunlari Turkmanistonning Ashxobod shahrida matematika bo'yicha IV Xalqaro ochiq fan olimpiadasi (OMOUS-2024) bo‘lib o‘tdi.
Ushbu munosabat bilan Renessans ta'lim universitetining faollar zalida ishtirokchilarni taqdirlash marosimi o'tkazildi. Dastlab, rektor Nusratilla Rajabovich Barakayev so'zga chiqib, talabalarimizni muvaffaqiyatli yutuq bilan tabrikladi. "Ishtirokchilar olimpiadaga kuchli tayyorgarlik ko'rishgan. Professional ustozlarimiz ko'magi sabab, xalqaro olimpiadada Rossiya, Saudiya Arabistoni, Ispaniya, Xitoy, Bolgariya va mezbon Turkmaniston oliy ta’lim muassasalari talabalari orasida faxrli o'rinni egallab, individual tarzda 2 ta bronza medalni qo'lga kiritishdi" deya, ta'kidladi N.Barakayev.
“Bugungi qahramonlarimiz matematika fan olimpiadasi bo‘yicha universitetimizning ilk qaldirg'ochlari sanaladi. O'zbekistondan xususiy oliy ta'lim muassasalari ichida faqat Renessans ta'lim universiteti talabalari ishtirok etdi. Bu esa, xursand bo'ladigan natija. Universitetimizning ta'lim sifatini oshishida siz kabi yoshlarning harakati va intilishi muhim ahamiyatga ega" dedi, Matematika va Axborot texnologiyalari kafedrasi mudiri G'anisher G'afirovich Yunusov.
Uchrashuv so'ngida, ishtirokchi talabalar: Dilnavoxon Dilshodova, Salimbek Ergashov, Abdulaziz Abdulatifov, Abdujalil Kurchiyev va ularning ustozlari: G'anisher Yunusov, Shodmon Turdiyevga diplom va esdalik sovg'alari topshirildi.
