Oʻzbekiston Respublikasi Vazirlar Mahkamasining 2018-yil 25-oktabrdagi “Oʻquvchi va talaba yoshlar oʻrtasida oʻtkaziladigan respublika sport musobaqalari tizimini yanada takomillashtirish toʻgʻrisida”gi va Vazirlar Mahkamasining 2024-yil 4-oktabrdagi “Universiada” sport musobaqalarining respublika final bosqichlarini oʻtkazishga tayyorgarlik koʻrish va uni yuqori saviyada oʻtkazish chora-tadbirlari toʻgʻrisida”gi qaroriga koʻra 2025-yil 15–19-yanvar kunlari Buxoro shahrida sportning voleybol turi boʻyicha respublika bosqichi musobaqalari oʻtkazildi.
Avval xabar berganimizdek, Renessans ta’lim universiteti voleybol jamoasi Toshkent shahridagi 92 ta oliy ta’lim muassasalari o‘rtasida o‘tkazilgan “Universiada-2024” sport musobaqalarining hududiy bosqichida ajoyib natija ko‘rsatib, Respublika final bosqichiga yo‘l olgan edi.
Nihoyat, jamoamiz kuchli raqiblarga qarshi murosasiz o‘yin ko‘rsatib, Respublika final bosqichida faxrli 3-o‘rinni qo‘lga kiritdi!
Sevimli jamoamiz 20-yanvar kuni Toshkent markaziy vokzalida tantanali ravishda kutib olindi.
Musobaqa davomida har bir o‘yin bizning jamoamiz uchun murosasiz bo‘ldi. Raqiblarimizning puxta tayyorgarligiga qaramasdan, o‘z mahoratimiz va jamoaviy o‘yinimiz bilan yutuqqa erishdik.
Ushbu muvaffaqiyatning ortida butun universitet jamoasining hissasi bor, albatta. Ularni qo‘llab-quvvatlagan barcha talabalar, professor-o‘qituvchilar va xodimlarga samimiy minnatdorlik bildiramiz!
Mazkur natija faqat boshlanishi. Renessans ta’lim universitetining sport jamoasi kelgusi musobaqalarda ham universitet sharafini yuksaklarga ko‘tarishga tayyor! Voleybol jamoamizni erishilgan yutuq bilan samimiy tabriklaymiz!
