Yana bir yil tarixga muhrlanib, biz yangi yutuqlar, yangi marralar sari intilmoqdamiz.
Renessans ta’lim universiteti 2024-yilda jamoamizning tinimsiz mehnati va fidoyiligi sababli ko‘plab yutuqlarga erishdi. Bu yil biz kelajakni yaratish yo‘lida katta qadamlar tashladik.
2024-yildagi asosiy yutuqlarimizga nazar solsak, universitetimiz professor oʻqituvchilarining ilmiy salohiyati avvalgi yilga nisbatan sezilarli darajada ko‘tarilib, qariyb 50 foizni tashkil etdi. Oʻtgan davr mobaynida 8 nafar o‘qituvchilarimiz oʻz dissertatsiyalarini himoya qildi, 15 nafar o‘qituvchilarimiz ilmiy unvonga ega bo‘ldi.
2027-yilga qadar bu boradagi ishlarni jadallashtirib, ilmiy salohiyatni 70 foizdan oshirishni maqsad qilganmiz.
Bundan tashqari, 200 dan ortiq o‘quv qo‘llanmalar, 500 dan ortiq o‘quv adabiyotlar yaratildi. Shuningdek, Turkiyaning Anqara davlat universiteti hamda Karabuk universitetlari bilan hamkorlikda darsliklar va o‘quv qo‘llanmalar nashr etildi.
Talabalarimizning 3 nafari matematika fani bo‘yicha xalqaro olimpiadada, 12 nafari respublika va xalqaro sport musobaqalari hamda tanlovlarda g‘oliblikni qo‘lga kiritdi. 5 nafar talabalarimiz nomli Davlat stipendiyalariga sazovor boʻldi.
Bugun universitetimiz nafaqat yurtimizda, balki xalqaro maydonda ham o‘z o‘rnini mustahkamlab bormoqda. Yaqinda universitetimiz Indoneziyaning “UI Green Metric World University Rankings” xalqaro agentligi reytingidan joy olib, dastlabki yuqori natijalarni ko‘rsata boshladi. Bu, albatta, barchamiz uchun quvonarli yangilik!
Yangi 2025-yilda ham biz ulkan maqsadlarni ko‘zlaymiz, ko‘rsatkichlarning yanada oshirishga universitetimizda barcha sharoitlar yaratilgan. Jamoamiz bilan birgalikda universitetimizni bundan-da yuqori marralarga olib chiqishimizga ishonaman.
Xalqimizni, universitetimiz professor-o‘qituvchilarini, talabalar va ularning ota-onalarini hamda barcha xodimlarimizni yangi – 2025-yil bilan chin qalbimdan tabriklayman.
Yangi yilingiz muborak bo‘lsin!
Nusratilla Barakayev,
Renessans ta’lim universiteti rektori
