Ta’lim – har qanday davlatning taraqqiyot asosi. Yurt taraqqiy etishi, iqtisodiyoti va fan-texnikasi rivojlanishi uchun eng avvalo malakali kadrlar zarur. Shu bois, O‘zbekistonda ta’lim sifati va oliy ma’lumotli mutaxassislar sonini oshirishga katta e’tibor qaratilmoqda.
Keyingi yillarda bu borada qator islohotlar amalga oshirildi: oliy ta’lim muassasalariga qabul kvotalari kengaytirildi, xususiy universitetlar tashkil etilib, ularning rivojlanishiga ko‘maklashilmoqda. Bu esa yoshlar uchun yangi imkoniyatlar eshigini ochib, sifatli ta’lim olish va kelajakda o‘z sohasining yetakchisiga aylanish imkonini beradi.
Ana shunday o‘zgarishlar doirasida, joriy yilning 28-29-mart kunlari Toshkent shahridagi “Hyatt Regency Tashkent” mehmonxonasida Oliy ta’lim, fan va innovatsiyalar vazirligi boshchiligida Renessans ta’lim universiteti tomonidan “Oliy ta’limni tashkil etishda xorijiy tajribalar: transformatsiya va innovatsiyalar” mavzusida xalqaro ilmiy-amaliy konferensiya tashkil etildi.
Unda mamlakatimizdagi 100 dan ortiq mahalliy vazirlik va idoralar, oliy ta’lim muassasalari vakillari bilan birgalikda, dunyoning Amerika Qo‘shma Shtatlari, Germaniya, Fransiya, Janubiy Koreya, Shvetsiya, Rossiya, Meksika, Finlandiya, Bolgariya, Xitoy, Turkiya, Hindiston, Pokiston, Eron, Markaziy Osiyo hamda Mustaqil Davlatlar Hamdo‘stligi davlatlaridagi nufuzli yetakchi oliy ta’lim muassasalari rektorlari, professor-o‘qituvchilari, taniqli olimlar, ekspertlar, YUNESKO kabi xalqaro tashkilotlarning mutaxassislari ishtirok etdi.
Konferensiya yuqori malakali mutaxassislarni tayyorlashda xalqaro tajriba almashish, ta’lim transformatsiyasi, innovatsion yondashuvlar, ilmiy-amaliy tadqiqotlar va innovatsiyalarni rivojlantirish, moliyalashtirish va boshqarish kabi masalalarni muhokama qilish maqsadida tashkil etildi.
Xalqaro konferensiyani Renessans ta’lim universiteti rektori, professor Nusratilla Barakayev ochib berdi. Shundan so‘ng, O‘zbekiston Respublikasi Oliy taʼlim, fan va innovatsiyalar vаziri, texnika fanlari doktori, professor Sharipov Kongratbay Avezimbetovichning konferensiya ishtirokchilariga tabrigini vazirlikning Ilm-fan va innovatsion faoliyatni rivojlantirish boshqarmasi boshlig‘i Bozorov Otabek Xasanboyevich o‘qib, eshittirdi.
Tadbir davomida turli yo‘nalishlar bo‘yicha ilmiy taqdimotlar namoyish etildi. Jumladan, YUNESKO tashabbuslari asosida oliy ta’limni rivojlantirish, 2024-2025 Global ta’lim monitoringi hisobotining milliy taqdimoti hamda innovatsion yondashuvlar mavzulari muhokama qilindi.
Shuningdek, YUNESKOning O‘zbekistondagi vakili, Amerikaning nufuzli Jons Hopkins universiteti, Germaniyaning Drezden texnik universiteti, Rossiyaning Qozon federal universiteti, Finlandiyaning Yuvaskula kabi ilg‘or oliygohlaridan taniqli professorlar qatnashib, samarali muloqot olib bordi.
Dunyoning yetakchi olim va mutaxassislari o‘z tajribalarini o‘rtoqlashdi, oliy ta’limda transformatsiya jarayonlari, dunyoda ilm-fanni rivojlantirishga qaratilgan islohotlarning mazmun-mohiyati, ularning amaliy natijalari hamda kelgusidagi ustuvor yo‘nalishlar haqida fikr almashildi.
Anjuman doirasida ikki asosiy yo‘nalish bo‘yicha sho‘ba yig‘ilishlari bo‘lib o‘tdi:
• “Oliy ta’lim transformatsiyasi trendlari” – oliy ta’lim tizimini moliyalashtirish va boshqaruv masalalariga bag‘ishlandi.
• “Innovatsion ta’lim yondashuvlari va texnologiyalar” – oliy ta’limda tadqiqot va innovatsiyalarni rivojlantirish imkoniyatlari muhokama qilindi.
Taniqli professorlar o‘z tajribalari bilan o‘rtoqlashdi. Xususan, Germaniyaning Drezden texnik universiteti vakili Julia Koinova-Zoellner ta'limdagi o‘zgarishlar va o‘qituvchi tayyorlash tizimi bo‘yicha fikr bildirdi. Rossiyaning Qozon federal universiteti professori Shayxelislamov Rais Falixovich kasb-hunar ta’limi bo‘yicha tajriba almashdi, Finlandiyaning “Prime Education Finland” direktori Ilhom Halimzoda esa xalqaro ta’lim transformatsiyasi haqida ma’ruza qildi.
Germaniyadan tashrif buyurgan mutaxassis Slexa Teleuvova ilmiy hamkorlikning ahamiyatiga to‘xtalar ekan, shunday deydi:
“Bizning asosiy e’tiborimiz O‘zbekiston va Germaniya oliygohlari o‘rtasidagi ilmiy almashinuvlarni rivojlantirish, talabalar uchun almashinuv dasturlarini yo‘lga qo‘yish hamda ilmiy salohiyatni oshirishga qaratilgan. Ikki davlat o‘rtasidagi mustahkam akademik hamkorlikni shakllantirish bizning bosh maqsadimizdir”.
Finlandiyadan tashrif buyurgan professor Ilhom Halimzoda xalqaro konferensiya to‘g‘risida iliq fikr bildirdi:
“Ushbu xalqaro konferensiya meni juda xursand qildi. Unda turli mamlakatlardan ko‘plab mutaxassislar ishtirok etib, o‘z tajribalarini o‘rtoqlashdi. Qiziqarli munozaralar tashkil etildi. O‘ylaymanki, bu kelgusida ta’lim tizimini yanada rivojlantirish uchun xizmat qiladi”.
Hindistondan tashrif buyurgan professor Rijvan xalqaro konferensiyaning ahamiyatiga to‘xtalar ekan, shunday deydi:
“Ushbu konferensiyada ishtirok etishdan juda mamnunman. Bunday uchrashuvlar nafaqat o‘z bilimlarimizni boshqalar bilan ulashish, balki yangi ma’lumotlarni o‘rganish uchun ham muhim platforma hisoblanadi. Bugungi kunda O‘zbekiston va Hindiston o‘rtasidagi ta’lim sohasidagi hamkorlik yuksak bosqichga chiqqani quvonarli. Hind yoshlarining O‘zbekistonda, o‘zbekistonlik talabalarning esa Hindistonda tahsil olishi uchun keng imkoniyatlar yaratilgan. Shuningdek, til o‘rganishga berilayotgan katta e’tibor madaniyat va tarixni o‘zaro anglashga ham xizmat qilmoqda.
Bugungi xalqaro konferensiyaning bir qismi bo‘lganimdan mamnunman. Bizni iliq kutib olishdi, mehmondo‘stlik juda yuqori darajada. Shu tadbir orqali yangi tajribalar orttirib, muhim kelishuvlarga erishdik. Ushbu muloqotlar do‘stligimiz va ilmiy hamkorligimizni yanada mustahkamlashiga ishonaman”.
Konferensiyaning ikkinchi kuni ishtirokchilar Toshkent va Samarqand shahrining diqqatga sazovor joylari, madaniy maskanlari bilan tanishish imkoniyatiga ega bo‘ldilar. Buyuk ajdodlarimiz merosi, qadimiy me’moriy yodgorliklar va zamonaviy shahar hayoti ularda unutilmas taassurot qoldirdi.
Umuman olganda, anjuman mazmunli muhokamalar, innovatsion fikrlar va kelajak ta’lim strategiyalari bilan esda qoldi. Konferensiyada 40 dan ortiq ilmiy ma’ruzalar tinglandi va qator muhim xulosalar qilindi.
Konferensiya yakunida ishtirokchilar o‘rtasida uzoq muddatli hamkorlikni mustahkamlash va axborot hamda tajriba almashish uchun doimiy platforma yaratish bo‘yicha kelishuvga erishildi. Shuningdek, xalqaro ta’lim standartlarini yanada keng joriy etish, oliy ta’lim sifatini takomillashtirish va yangi ilmiy-amaliy tadqiqotlarga keng yo‘l ochish bo‘yicha aniq takliflar ishlab chiqildi.
Konferensiya oliy ta’limni transformatsiya qilish va xalqaro tajribani joriy etish bo‘yicha muhim muloqot maydoni bo‘lib xizmat qildi. Unda ko‘tarilgan dolzarb masalalar, ishlab chiqilgan takliflar va o‘rnatilgan yangi hamkorlik aloqalari mamlakatimizda ta’lim sifatini oshirishda muhim qadam bo‘lishi, shubhasiz.
Shu tariqa “Oliy ta’limni tashkil etishda xorijiy tajribalar: transformatsiya va innovatsiyalar” xalqaro ilmiy-amaliy konferensiyasi o‘z ishini muvaffaqiyatli yakunladi.
O'zbekcha
Русский
English
